der swiss deutsch thread(nur schweizerdeutsch schreiben)

[mikezzz]

Z hoffe isch es uf jede Fau nid. Weni aber luege, mit was für Kontrollene das me bi üs i de letschte Jahr igfahre isch (und mir hei ja würklech nid grossi Beträg, wo mer dermit schaffe, scho gar nid ohni explizite Chundeuftrag) chame nume hoffe, dass si i de andere Beriche mindestens glich streng worde si.

Bi üs hei ja irgendwie vor es paar Jahr 2 Händler sech gägesitig deckt und Positione absichtlich fausch bewärtet, wüu si hei s Gfüu gha, dass si ihre "Lohn" nid bechöme, we sis richtig mache... U irgendeinisch ischs haut de sowit bachab, dass sis vor em Scheff nümm hei chönne verstecke... Hett haut de o grad es paar Millione koschtet... Denn isch übrigens o no e gwüsse Herr der Big Boss gsi...

S Houptproblem isch haut, dass itze wider jede wo bi dene schaffet der Depp isch. Insbesondere die hie ir Schwiz, wo tagus u tagi e guete Job mache, für ihrer Chunde da si und dere Firma loyal und ergäbe si.

Und natürlech darfs nid möglech si, dass e einzelni Person d Möglechkeit het, d Kontrollsystem z umgah. Wobi mini persönlechi Asicht die isch, dass itze dä Herr haut der Gring mues häre ha u wes guet cho wär si Scheff der Heud u Gwinnmacher für die Firma wär gsi... Aber isch ja scho ir Vergangeheit bi andere bi de Grichtsverhandlige immer so chli e fahle Bigschmack gsi, öb äch nid doch no meh Lüt dervo gwüsst unds schlussendlech o deckt hei...

Aber isch haut o süsch so: Wenn e ganze Berich vom oberste Boss deckt und ungerstützt wird (und dermit Profite höch blibe), de wird haut jedi Ungersuechig guet use cho... Vor auem we si intern isch. Siehe üses Gschäft übere gross Teich... U de bruchts haut irgendwenn konkreti Achlage vo usserhaub, für dass de öppis geit... Leider.